Ադրբեջանը հայտարարել է, թե Զանգեզուրի միջանցքը կդառնա նոր միջանցք՝ «եղբայրական Պակիստանից» դեպի Թուրքիա և Ադրբեջան

«Զանգեզուրի միջանցքը կդառնա նոր միջանցք՝  եղբայրական Պակիստանից դեպի Թուրքիա և Ադրբեջան»,-  այսօր նման հայտարարությամբ է հանդես եկել Ադրբեջանի Միլլի մեջլիսի նախագահ Սահիբա Գաֆարովան։

Վերջինս այս հայտարարությունն արել է Ադրբեջանի, Պակիստանի և Թուրքիայի խորհրդարանների նախագահների առաջին եռակողմ հանդիպման ժամանակ։

Գաֆարովան կարևորել է եռակողմ ձևաչափով նման հանդիպումների անցկացումը։

«Այդ հարթակը կծառայի մեր երկրների առավել սերտ միավորմանը։ Եռակողմ հանդիպման շրջանակներում կընդունվի Բաքվի հռչակագիրը։

Հռչակագրում կարևորվելու է վարել միջխորհրդարանական երկխոսություն, ընդլայնել համագործակցությունը, միջազգային կազմակերպություններում համատեղ քայլեր ձեռնարկել»։

Գաֆարովան նաև հայտնել է, որ Բաքվի հռչակագրի շրջանակում կարևոր է համարում աջակցությունը՝ Ադրբեջանին ականապատված տարածքների քարտեզների տրամադրման հարցում:

Հանդիպումից հետո Բաքվի հռչակագիրը ստորագրել են Ադրբեջանի Միլլի մեջլիսի նախագահ Սահիբա Գաֆարովան, Թուրքիայի Մեծ ազգային ժողովի նախագահ Մուստաֆա Շենթոփը և Պակիստանի Ազգային ժողովի նախագահ Ասադ Կայսերը: