Մերկելը և Բայդենը հայտարարել են «Հյուսիսային հոսք»-ի շուրջ տարաձայնությունների մասին

ԱՄՆ նախագահ Ջո Բայդենը և Գերմանիայի կանցլեր Անգելա Մերկելը Վաշինգտոնում ընթացող բանակցություններից հետո հայտարարել են, որ տարբեր դիրքորոշումներ ունեն Ռուսաստանի կողմից «Հյուսիսային հոսք-2» գազատարի կառուցման վերաբերյալ:

BBC-ի ռուսական ծառայությունը հիշեցնում է, որ սա Մերկելի վերջին պաշտոնական այցն էր ԱՄՆ՝ որպես կանցլեր (սեպտեմբերի ընտրությունների նա այլևս չի մասնակցի):

Բանակցությունների հիմնական թեմաներն էին Ուկրաինայի տարածքով ռուսական գազի տարանցումը և «Հյուսիսային հոսքի» կառուցումը: «Լավ ընկերները երբեմն տարաձայնություններ ունենում են»,- ասել է Բայդենը եզրափակիչ ասուլիսում` նշելով, որ ինքն իր մտահոգություններն է հայտնում ռուսական գազատարի կառուցման հետ կապված:

Մերկելն ասել է, որ Ուկրաինան շարունակում է մնալ տարանցիկ երկիր ռուսական գազի համար, իսկ Մոսկվայի կողմից պարտավորությունների խախտման դեպքում ԵՄ-ն ունի «բազում գործիքներ»: «Ինձ համար «Հյուսիսային հոսքը» լրացուցիչ նախագիծ է, այն չի փոխարինում Ուկրաինայի տարածքով ռուսական գազի տարանցմանը»,- ասել է Գերմանիայի կանցլերը: