Վրաստանում չորս հեռուստաալիք մեկ օրով դադարեցրել է հեռարձակումը՝ պահանջելով վարչապետի հրաժարականը

Վրացական «Մտավարի Արխի», «TV Պիրելի», «Ֆորմուլա» և «Կավկասիա»  հեռուստաալիքները չորեքշաբթի մեկ օրով դադարեցրել են հեռարձակումը` պահանջելով Վրաստանի վարչապետ Իրակլի Ղարիբաշվիլիի հրաժարականը` կապված հուլիսի 5-ին ԼԳԲՏ երթին ընդդիմացողների կողմից (ըստ պաշտոնական տեղեկատվության) ծեծի ենթարկված՝ «Պիրելի»-ի օպերատոր Ալեքսանդր Լաշկարավայի մահվան հետ: Այս մասին ասվում է «Մտավարի Արխի»-ի հրապարակված հայտարարության մեջ:

«Իրակլի Ղարիբաշվիլիին՝ դեպի հրաժարական: Պատժեք բոլոր՝ բռնություն կիրառողներին. Ի նշան բողոքի՝ չորս հեռուստաընկերություններ՝ «Մտավարի Արխի», «TV Պիրելի», «Ֆորմուլա» և «Կավկասիա» , կդադարեցնեն հեռարձակումը 24 ժամով»,- ասվում է հայտարարության մեջ:

Վաղ առավոտից  հեռուստաընկերությունների էկրաններին՝ սև ֆոնին, գրված են Վրաստանում վերջին օրերի բախումների ժամանակ վիրավորված 53 լրագրողների, օպերատորների և լուսանկարիչների անունները: