Կիևի ոստիկանությունը ծեծի է ենթարկել ադրբեջանցիների

Հայտնի են դարձել մայիսի 29-ին Ուկրաինայի մայրաքաղաք Կիևում ադրբեջանցիներին ծեծի ենթարկելու մանրամասները: Դեպքի ընթացքում 5 ադրբեջանցի ծեծի էր ենթարկվել. նշում է ադրբեջանական Report–ը։

Այդ ադրբեջանցիներն են Ալվերդի և Ֆիքրեթ Մամեդով եղբայրները, որոնք մանր առևտրով են զբաղվում Կիևի Դնեպր թաղամասի Ալմաթի 54 հասցեում գտնվող վրանում, և նրանց համագյուղացիները՝ Խազար Ջաբարովը, Էլման Մանսիմովը և Սադայ Ջաբարովը:

Ադրբեջանցիները ծեծի են ենթարկվել Կիևի մարզային ոստիկանության սպաների կողմից, որոնք քաղաքացիական հագուստով են եղել: Միջադեպի պատճառը մայիսի 28-ին Իրպենի քաղաքային դատարանի դատական նիստի ընդմիջման ժամանակ մի քանի հոդվածներով մեղավոր ճանաչված ադրբեջանցի Աֆսար Մամեդովի (ծնվ. 1973 թ.) փախուստն էր: Աֆսարը Մամեդով եղբայրների քեռին է և փախուստից հետո կապ էր պահպանում նրանց հետ:

Ոստիկանության աշխատակիցները կապվել են նրա հարազատների հետ և ժամանել նրանց աշխատավայր: Հետո խնդրել են ասել Աֆսարի գտնվելու վայրը: Հարազատների հրաժարվելուց հետո ոստիկանությունը նրանց նկատմամբ ուժ է կիրառել: