Ուկրաինայի իշխանությունները գանձապետարան են վերադարձրել «նախկիններից» Յանուկովիչի միլիարդները

Ուկրաինայի նախկին նախագահ Վիկտոր Յանուկովիչին ու նրա շրջապատին պատկանող 1,5 միլիարդ դոլարը վերադարձվել է Ուկրաինայի բյուջե: Այս գումարի մեծ մասը (87%) կանխիկ է եղել:

Ըստ «Ամերիկայի ձայնի»՝ ուկրաինական հեռուստատեսության եթերում Ուկրաինայի արտաքին գործերի փոխնախարար Եվգենի Ենինն ասել է, որ «վերադարձվել են ոչ թե առասպելական որոշ արժեթղթեր», այլ 1.3 միլիարդ դոլար կանխիկ և մոտ 200 միլիոն դոլարի արժեթղթեր: Այս գումարի վերադարձն ապահովել է Ուկրաինայի պետական պարտքի՝ 1,5 միլիարդ դոլարով կրճատում։ «ԱՄՆ-ի հետ երկկողմ հարաբերությունների պատմության մեջ առաջին անգամ մենք ամերիկյան հողից հետ ենք բերել 600 000 դոլար»,- ասել է Ենինը:

Փոխնախարարի խոսքով՝ Յանուկովիչը և նրա շրջապատը «փողեր են հավաքել Ուկրաինայի ամբողջ տարածքից, տնտեսության բոլոր ճյուղերից, լվացել դրանք նախ՝ Ուկրաինայում, ապա՝ այսպես կոչված, հանգուցային ձեռնարկությունների միջոցով այդ փողերը փոխանցել են «լվացման» միջազգային կենտրոններ: Փոխնախարարը վստահեցրել է, որ Յանուկովիչի և նրա շրջապատի նախկին ունեցվածքի վերադարձման ուղղությամբ աշխատանքները շարունակվում են: