Իրաքի հյուսիսում Թուրքիայի ապօրինի գործողությունների ընթացքում սպանվել է 2 թուրք զինվոր

Հյուսիսային Իրաքում Թուրքիայի զինված ուժերի երկու զինծառայող է սպանվել քրդերի հետ փոխհրաձգության արդյունքում. տեղեկությունը հայտնում է «Անադոլու» գործակալությունը՝  Թուրքիայի ազգային պաշտպանության նախարարության մամուլի ծառայության հղումով:

Նախարարությունը նշել է, որ «ահաբեկիչների» (թուրքերը Քուրդիստանի աշխատավորական կուսակցությունը համարում են ահաբեկչական) ու թուրք զինծառայողների փոխհրաձգությունը տեղի է ունեցել նախորդ օրը՝ «Ճանկ-կայծակ» (Pençe-Yıldırım) գործողության ընթացքում:

Զինծառայողներից մեկը տեղում մահացել է, մեկը վիրավորվել է ինքնաշեն պայթուցիկ սարքից ու տեղափոխվել հիվանդանոց: Որոշ ժամանակ անց նա մահացել է:

Նշենք, որ երեկ Թուրքիայի ՊՆ–ն հայտնել էր ևս մեկ սպանված թուրքի մասին, քրդերն էլ նշել էին, որ սպանված թուրքերի թիվը հասնում է 10-ի, կան բազմաթիվ վիրավորներ, և խոցվել են մի քանի ուղղաթիռներ։