Պուտինն ու Բայդենը հեռախոսազրույց են ունեցել

ԱՄՆ նախագահ Ջո Բայդենը և Ռուսաստանի Դաշնության նախագահ Վլադիմիր Պուտինը հաստատել են ռազմավարական կայունության շուրջ բանակցելու՝ իրենց մտադրությունը. հայտնել է Սպիտակ տունը՝ ներկայացնելով հեռախոսազրույցի մանրամասները։

«Նրանք քննարկել են մի շարք տարածաշրջանային և գլոբալ խնդիրներ, այդ թվում` ԱՄՆ-ի և Ռուսաստանի՝  ռազմավարական կայունության շուրջ երկխոսելու մտադրությունը, զենքի վերահսկման մի շարք հարցեր և START III պայմանագրի երկարաձգման հիմքով առաջացող անվտանգության սպառնալիքները»,- ասվում է հայտարարության մեջ։

Ջո Բայդենը Վլադիմիր Պուտինին իր մտահոգությունն է հայտնել Ղրիմում և Ուկրաինայի հետ սահմանին ռուս զինվորականների «հանկարծակի» տեղակայման կապակցությամբ:

«Նախագահ Բայդենը շեշտել է Ուկրաինայի ինքնիշխանությանն ու տարածքային ամբողջականությանը սատարելու՝ Միացյալ Նահանգների անսասան հանձնառությունը և մտահոգություն հայտնել բռնազավթված Ղրիմում ու Ուկրաինայի սահմանին Ռուսաստանի հանկարծակի ռազմական կուտակման կապակցությամբ»,- ասվում է Սպիտակ տան հայտարարության մեջ։

Նշվում է նաև, որ Բայդենը «Ռուսաստանին կոչ է արել լիցքաթափել լարվածությունը»: