Թուրքիայում իշխող կուսակցությունը նոր ղեկավար կազմ ունի. Էրդողանը վերընտրվել է նախագահի պաշտոնում

Թուրքիայի նախագահ Ռեջեփ Թայիփ Էրդողանը հրապարակել է իշխող «Արդարություն և զարգացում» կուսակցության Կենտրոնական գործադիր կոմիտեի նոր գումարման անդամների ցուցակը:

ԱԶԿ փոխնախագահներ են նշանակվել երկրի նախկին վարչապետ ու ԹԱՄԺ նախկին նախագահ Բինալի Յըլդըրըմը և Նուման Քուրթուլմուշը:

Օմեր Չելիքը վերընտրվել է իշխող կուսակցության մամուլի քարտուղարի պաշտոնում:

Թուրքիայի նախագահը չորեքշաբթի՝ մարտի 24-ին, Անկարայում կայացած ԱԶԿ 7-րդ համագումարում միաձայն վերընտրվել է իշխող կուսակցության նախագահի պաշտոնում:

«Արդարություն և զարգացում» կուսակցությունը Թուրքիայում ղեկավարում է 2002 թվականից:

Հիշեցնենք, որ ԱԶԿ–ն ստեղծվել է 2001 թ. օգոստոսին, ամիսներ անց՝ արդեն 2002 թ., հաղթել է ընտրությունները՝ կազմելով միակուսակցական կառավարություն, իսկ արդեն 2003 թ.՝ կուսակցության հիմնադիր Էրդողանի՝ քաղաքականությամբ զբաղվելու արգելքը հանելուց հետո, նա դառնում է երկրի վարչապետ (այդ ժամանակ խորհրդարանական հանրապետության) և մինչ օրս միանձնյա ղեկավարում է երկիրը։