Թուրքիան բոլոր ջանքերը կգործադրի նոյեմբերի 10-ի հայտարարությունը կյանքի կոչելու համար. Էրդողան

Թուրքիան բոլոր ջանքերը կգործադրի անցյալ տարվա նոյեմբերի 10-ին ստորագրված համատեղ հայտարարության պայմանների կատարումն ապահովելու համար: Այս մասին այսօր հայտարարել է Թուրքիայի և «Արդարություն և զարգացում» իշխող կուսակցության նախագահ Ռեջեփ Թայիփ Էրդողանը կուսակցական 7-րդ համագումարում:

«30 տարի առաջ Լեռնային Ղարաբաղի և Ադրբեջանի տարածքի 20 տոկոսի գրավման ընթացքում կատարված արյունալի սպանությունները դարձել են չսպիացած վերք ոչ միայն մեր ադրբեջանցի եղբայրների, այլև մեր սրտերում»,– նշել է Էրդողանը։

Թուրքիայի նախագահը «անարդյունավետ» է  որակել Մինսկի խմբի՝ վերջին տարիների գործունեությունը և հիշեցրել, որ Հայաստանը պարբերաբար խախտում էր հրադադարի ռեժիմը:

«Այս ամբողջ ընթացքում Ադրբեջանը ջանքեր էր գործադրում հակամարտությունը խաղաղ ճանապարհով լուծելու համար: Երբ անցյալ տարվա սեպտեմբերի 27-ին Հայաստանը հերթական սադրանքն արեց և սկսեց նախահարձակ լինել, Ադրբեջանը սկսեց հակագրոհել, և մենք մոտ էինք մեր եղբայրական երկրին: Ադրբեջանական բանակի հերոսության շնորհիվ 30-ամյա օկուպացիան ավարտվեց»,- Էրդողանին մեջբերում է «Անադոլու» գործակալությունը: