Ռուսական ընկերությունները նավթ կփնտրեն Սիրիայի ափերի մոտ

Երկու ռուսական ընկերություններ կսկսեն նավթի ու գազի որոնողական աշխատանքները Արևելյան Միջերկրական ծովում: Այս մասին հայտնում է սիրիական «Ալ Սավրա» թերթը:

Ըստ թերթի` համաձայնագիրը ստորագրվել է Սիրիայի նավթի և հանքային ռեսուրսների նախարարության ու Capital Limited և East Med Amrit ռուսական նավթային ընկերությունների կողմից: Պայմանագրի համաձայն՝ Capital Limited-ը կանցկացնի հանքավայրերի ուսումնասիրություն 2250 քառ. կմ հեռու Տարտուսի ափից՝ Միջերկրական ծովի արևելյան մասում: Պայմանագիրը կնքվում է 25 տարի ժամկետով՝ գումարած ևս 5 տարի:

Երկրաբանական հետախուզական աշխատանքները նախատեսված են 48 ամսվա համար, անհրաժեշտության դեպքում կարող են երկարաձգվել 36 ամսով: Հանքավայր հայտնաբերելու դեպքում զարգացման վերջնական որոշում կկայացվի՝ հաշվի առնելով ածխաջրածինների արտադրության ներուժը։