Ղարաբաղում սադրանքներ չեն եղել ռուս խաղաղապահների դեմ. Լավրով

Ռուսաստանը չի նշել որևէ սադրանք Լեռնային Ղարաբաղում իր խաղաղապահների դեմ: Այս մասին ՏԱՍՍ-ին տված հարցազրույցում ասել է Ռուսաստանի արտգործնախարար Սերգեյ Լավրովը:

«Լեռնային Ղարաբաղի հակամարտության գոտում իրավիճակը կարգավորվելու միտում ունի,- ընդգծել է նա:- Մենք գոհունակությամբ նշում ենք Բաքվի և Երևանի`իրենց պարտավորությունները կատարելու, իրավիճակի ընդհանուր կայունացման ուղղությամբ աշխատելու մտադրությունը: Ռուսաստանն էլ իր հերթին շարունակում է պատասխանատու կերպով և արդյունավետ կատարել հրադադարի երաշխավորի՝ իր գործառույթը: Դեռևս սադրիչ գործողություններ չեն եղել Ռուսաստանի խաղաղապահների դեմ»:

Լավրովը նշել է, որ դեկտեմբերի 13-ին միակ նկատելի խախտումը տեղի է ունեցել շփման գծում, որտեղ ռուս խաղաղապահներ չեն եղել: «Ադրբեջանի և Հայաստանի գործընկերների հետ շփման ընթացքում մեր խաղաղապահ զորախմբի հրամանատարության ձեռնարկած ակտիվ քայլերը հնարավորություն տվեցին խուսափելու միջադեպի սրացումից: Մենք շարունակելու ենք գործադրել բոլոր ջանքերը՝ կանխելու  համար զինադադարի խախտումը»,– եզրափակել է նա: