Պենտագոնը հերքել է Բայդենի խոսքերը իշխանության փոխանցման ձգձգումների մասին

Պենտագոնը հերքել է ԱՄՆ նորընտիր նախագահ Ջո Բայդենի հայտարարությունը, թե գերատեսչության քաղաքական ղեկավարությունը խոչընդոտներ է ստեղծում իշխանության փոխանցման գործընթացում:

«Պաշտպանության նախարարությունը 164 հարցազրույց է անցկացրել ավելի քան 400 աշխատակիցների հետ և տրամադրել ավելի քան 5000 էջ փաստաթղթեր, ինչը շատ ավելին է, քան Բայդենի անցումային թիմն էր պահանջում»,- ասել է Պենտագոնի ղեկավարի պաշտոնակատար Քրիստոֆեր Միլերը պաշտոնական կայքում տեղադրված հայտարարության մեջ:

Երկուշաբթի Բայդենը հայտարարել էր, որ պաշտպանության նախարարության քաղաքական ղեկավարությունը խոչընդոտում է իշխանության փոխանցմանը հաջորդ նախագահի վարչակազմին:

Ըստ Միլերի՝ Պենտագոնի աշխատակիցներն աշխատում են առավելագույն արհեստավարժությամբ, որպեսզի սեղմ ժամանակահատվածում աջակցեն անցումային խմբի ջանքերին, և կշարունակեն դա անել թափանցիկ և կոլեգիալ եղանակով, որը կհամապատասխանի գերատեսչության ամենաբարձր չափանիշներին: