Պատժամիջոցներից հետո Թուրքիան կարող է փակել ԱՄՆ ուժերի մուտքը Ինջիրլիքի ավիաբազա

Թուրք լրագրող Զուլֆիքար Դողանը նշում է, որ Թուրքիան կարող է վրեժ լուծել Միացյալ Նահանգներից թուրքական պաշտպանական արդյունաբերության դեմ վերջին պատժամիջոցների համար՝ պահանջելով լքել Ինջիրլիքի ավիաբազան:

Ըստ նրա՝ այս տարբերակը Անկարայի ծանոթ սպառնալիքներից է, երբ Վաշինգտոնի հետ նրա հարաբերությունները մտնում են բացասական փուլ:

Ըստ Ahval–ի՝ ամերիկյան պատժամիջոցները արգելում են թուրքական ռազմական արդյունաբերությանը՝ վարկեր ստանալ ամերիկյան կամ միջազգային ֆինանսական հաստատություններից, սահմանափակում են արտահանման լիցենզիաները թուրքական ռազմական արտադրանքի համար, որոնք արտադրվում են ամերիկյան բաղադրիչներով, և նախաձեռնում են վիզայի ու ակտիվների սառեցում ընկերության ղեկավարների համար:

Ինջիրլիքի ավիաբազան տասնամյակներ շարունակ համատեղ շահագործվում է ԱՄՆ-ի և Թուրքիայի ռազմաօդային ուժերի կողմից, այն կարևոր հենակետ է ԱՄՆ գործողությունների համար Իրաքում և Սիրիայում: Բացի այդ՝ բազայում տեղակայված են նաև մարտավարական միջուկային զենքեր: