ՏԵՍԱՆՅՈՒԹ․ Մենք ձեռքներս վերև բարձրացրած՝ մտնելու ենք այս շենքը․ Փաշինյանի հրաժարականը պահանջողները փորձեցին կառավարության շենք մտնել

«Ոստիկա՛ն, ճամփա բաց» վանկարկումներով՝ Փաշինյանի հրաժարականը պահանջող ցուցարարները փորձեցին մտնել կառավարության շենք և հանդիպել Նիկոլ Փաշինյանի հետ՝ հայտնում է Yerkir.am-ը։

Ցուցարարները հայտարարեցին, որ իրենք բախում չեն ուզում, ուզում են մտնել ու այդ մարդուն բացատրել՝ ինչ է կատարվում, որ՝ երկիրը խորը ճգնաժամի մեջ է և ինքը պետք է հեռանա։

«Ձեր գերագույն հրամանատարը հայտարարել է, որ սա ժողովրդի շենքն է, այդ պատճառով էլ ցանկանում ենք մտնել մեր հարկերով սպասարկվող շենք, բացատրել երկրում ինչ վիճակ է ու դուրս գալ»,-ոստիկաններին ասաց ցուցարարներից մեկը։

Մեկ այլ ցուցարար ենթադրեց, որ Նիկոլ Փաշինյանը Ադրբեջանի պառադն է նայում և առաջարկեց, որ իջնեն և իրենց ուղեկցեն վարչապետի մոտ։

«Եթե բոլորին կարելի է այստեղ մտնել, ուրեմն մեզ էլ է կարելի։ Այսինքն, ով վարչապետի հետ համաձայն չէ, ուրեմն լավ քաղաքացի չէ՞»,-ասաց մեկ այլ ցուցարար։

Ավելի վաղ Հայրենիքի փրկության շարժման կազմակերպած ակցիայի մասնակիցները մանրադրամ նետեցին Փաշինյանի ու թիմի համար։