Ֆրանսիացի սենատորը բացատրել է Ղարաբաղի կարգավիճակի վերաբերյալ բանաձևի իմաստը

Ֆրանսիայի Սենատում Ֆրանսիա-Հայաստան բարեկամության խմբի նախագահ Ժիլբեր-Լյուկ Դևինը «Կոմերսանտ»-ին տված հարցազրույցում բացատրել է խորհրդարանի վերին պալատի՝ Լեռնային Ղարաբաղի անկախության ճանաչման մասին բանաձևի իմաստը:

Նրա խոսքով՝  Ֆրանսիայի Սենատը «դատապարտում է Ադրբեջանի ռազմական ագրեսիան և պահանջում անհապաղ դուրս բերել զորքերը և դրանց աջակցող ուժերին Լեռնային Ղարաբաղի տարածքներից»:

Փաստաթուղթը վերաբերում է նաև Ղարաբաղի խաղաղ բնակչությանն անհապաղ աջակցության տրամադրմանը և միջազգային խաղաղապահ ուժերի տեղակայմանը: Բանաձևը նշում է նաև ռազմական հանցագործությունների քննության համար միջազգային դատարան ստեղծելու անհրաժեշտության մասին:

Ամփոփելով՝ Սենատը կոչ է անում ճանաչել Լեռնային Ղարաբաղի անկախությունը, ինչը, խորհրդարանականների կարծիքով, կդառնա խաղաղ կարգավորման սկզբի երաշխիք: