ԱՀԿ-ն չի բացառել, որ կորոնավիրուսային համաճարակը հասել է գագաթնակետին

Անցյալ շաբաթ աշխարհում կորոնավիրուսային վարակի դեպքերի թվի նվազումը կարող է ցույց տալ, որ համաճարակը հասել է գագաթնակետին: Նման կարծիք է հայտնել Ռուսաստանի Դաշնությունում ԱՀԿ ներկայացուցիչ Մելիտա Վուինովիչը «Էխո Մոսկվի» ռադիոկայանին տված հարցազրույցում:

«Լավ նորություններ կան: Բայց անցյալ շաբաթ մենք 10%-ով ավելի քիչ դեպքեր տեսանք, քան 14 օր առաջ: Մենք, գուցե, արդեն գագաթնակետին ենք հասել, բայց պետք է նայենք թվերին, քանի որ յուրաքանչյուր երկիր ունի տարբեր իրավիճակ: Որոշ երկրներ դեռ արագություն են հավաքում, որոշ դեպքերում կարող ենք ասել, որ իրավիճակը կարծես կայունանում է»,- ասել է նա:

ԱՀԿ ներկայացուցիչը նշել է, որ կորոնավիրուսային վարակի տարածման էպիկենտրոնը գտնվում է Եվրոպայում և Հյուսիսային Ամերիկայում, իսկ անցյալ շաբաթ վարակման դեպքերի 81%-ն այնտեղ է գրանցվել: