Ֆրանսիայի Սենատում հորդորել են պատժամիջոցներ կիրառել Թուրքիայի նկատմամբ և բացառել նրան ՆԱՏՕ-ից

Նոյեմբերի 4-ին ֆրանսիացի սենատոր Ռեմի Ֆերոն արտաքին գործերի նախարար Ժան-Իվ Լե Դրիանին կոչ է արել Հինգերորդ հանրապետության և ամբողջ Եվրոպայի անունից պատժամիջոցներ կիրառել Հին աշխարհի անվտանգությանը սպառնացող ագրեսիվ գործողությունների համար:

«Ժամանակն է խոսքերից գործի անցնել», - ասել է Ֆերոն:

Սենատորը կարծում է, որ Անկարան պետք է բացառվի ՆԱՏՕ-ից, իսկ ԵՄ-ին Թուրքիայի անդամակցության հարցը կարելի է համարել փակված: «Թուրքիան գումա՞ր է ստանում ՆԱՏՕ-ի ֆոնդից»,- հարցնում է Ֆերոն՝ հավելելով, որ եթե ֆինանսավորման փաստը հաստատվի, վրդովեցուցիչ կլինի:

Ֆերոն պահանջել է, որ Լե Դրիանն աջակցի Սիրիայի քրդերին և երաշխիքներ տա, որ Փարիզը կդադարի զինել Թուրքիային:

Ֆրանսիայի Հայ դատի հանձնախումբը նույնպես դիմել է Ֆրանսիայի արտգործնախարարին. «Պարո՛ն նախարար, արցախահայությունը չի կարող անվերջ սպասել: Հապաղման ամեն օրը Էրդողանը օգտագործում է հայ ժողովրդին ոչնչացնելու համար: Մի՛ սպասեք դեկտեմբերին: Մենք հիմա պետք է գործենք»: