Վրաստանի ԱԳՆ ղեկավարը Հարավային Կովկասն անվանել է աշխարհի ամենաուժեղ տարածաշրջան և առաջարկել Թբիլիսին դարձնել ԼՂ բանակցությունների հարթակ

Վրաստանի արտգործնախարար Դավիթ Զալկալիանին Հարավային Կովկասն անվանել է աշխարհի ամենաուժեղ տարածաշրջան և առաջարկել Թբիլիսին դարձնել Լեռնային Ղարաբաղի հարցով բանակցությունների հարթակ: Ըստ Վրաստանի Հանրային հեռուստատեսության՝ արտգործնախարարը նման հայտարարություն է արել, երբ ելույթ է ունեցել Թբիլիսիում իշխող «Վրացական երազանք» կուսակցության նախընտրական արշավի շրջանակներում անցկացվող միջոցառման ժամանակ:

«Աշխարհում Հարավային Կովկասից ուժեղը չկա՝ ո՛չ տնտեսապես, ո՛չ ռեսուրսների և աշխարհաքաղաքական նշանակության առումով: Եթե Հարավային Կովկասում կայուն խաղաղություն հաստատվի, բոլորը կշահեն՝ տարածաշրջանը և տարածաշրջանից դուրս գտնվող բոլոր խոշոր պետությունները»,- ասել է Զալկալիանին:

Նա նշել է, որ Թբիլիսին պատրաստ է հանդես գալ որպես միջնորդ Բաքվի և Երևանի բանակցություններում: Զալկալիանին նաև շեշտել է, որ Վրաստանը միշտ էլ բարեկամական հարաբերություններ է պահպանում Հայաստանի ու Ադրբեջանի հետ: