Ջասթին Թրյուդոն Նիկոլ Փաշինյանի հետ հեռախոսազրույցում խորը մտահոգություն է հայտնել ԼՂ-ում ստեղծված իրավիճակի վերաբերյալ

Վարչապետ Նիկոլ Փաշինյանը շարունակում է հեռախոսազրույցներն իր արտասահմանյան գործընկերների հետ։

Կառավարության մամուլի ծառայությունից հայտնում են, որ այսօր ՀՀ վարչապետը հեռախոսազրույց է ունեցել Կանադայի վարչապետ Ջասթին Թրյուդոյի հետ:

Վարչապետ Նիկոլ Փաշինյանը մանրամասներ է ներկայացրել Արցախում ընթացող ռազմական գործողությունների եւ տարածաշրջանում տիրող ընդհանուր իրավիճակի մասին:

Զրուցակցի ուշադրությունը հրավիրվել է ռազմական գործողություններում Թուրքիայի կործանարար ներգրավվածության եւ Հարավային Կովկասում հաստատվելու այդ երկրի անընդունելի նկրտումների վրա:

Վարչապետը շնորհակալություն է հայտնել ռազմական նշանակություն ունեցող ապրանքների Թուրքիա արտահանումը կասեցնելու համար: Ընդգծվել է Լեռնային Ղարաբաղի հակամարտության կարգավորման հարցում ազգերի ինքնորոշման իրավունքի անխափան կիրառման սկզբունքային նշանակությունը:

Կանադայի վարչապետը խորը մտահոգություն է արտահայտել ստեղծված իրավիճակով եւ հույժ կարեւորել հակամարտությունը խաղաղ ճանապարհով կարգավորելու անհրաժեշտությունը: