Հունաստանից մոտ 80 քաղաքացի (50 հայ, 30 հույն) պատրաստվում են մեկնել Արցախ՝ ռազմաճակատ

Հունական Greek City Times լրատվամիջոցը հայտնում է, որ Հունաստանի մոտ 80 քաղաքացի պատրաստվում են մեկնել Արցախ՝ ռազմաճակատ՝ կռվելու թուրքական հովանավորությունը վայելող Ադրբեջանի ագրեսիայի դեմ: Այս մասին լրատվամիջոցին հայտնել է հունահայ քաղաքացի և անանուն մնալ ցանկացող մեկը:

Նրանք ասել են, որ Հայաստան մեկնող առաջին խումբը կազմված է 80 քաղաքացուց, որոնցից 50-ը հունաստանաբնակ հայեր են, իսկ 30-ը` էթնիկ հույներ: Ըստ նրանց՝ բոլորն եկել են ամբողջ Հունաստանից՝ Աթենքից, Թեսալոնիկից, Չալքիդիից, Կրետեից և Թհեսալիից:

Ազգությամբ հայ Իակովոս Ստամատիադիսը և անանուն քաղաքացին նշել են, որ իրենք չեն կարող նստել Հունաստանում և հետևել, թե ինչ է կատարվում իրենց հայրենիքում ու չկռվել:

«Ես կգնամ Հայաստան՝  աջակցելու իմ երկրին և կռվելու եմ: Իմ երկիրն ամեն ինչից վեր է»,- ասել է 30-ամյա քաղաքացին՝ ընդգծելով,որ Հունաստանը պետք է իր աջակցությունը հայտնի Հայաստանին. «Ես ունեմ հույն ընկերներ, ապրում եմ Հունաստանում: Գիտեմ, որ հույները մեզ հետ են: Հույները ցանկանում են գնալ Հայաստան և կռվել»: