Լեռնային Ղարաբաղը Ադրբեջանի ինքնիշխան տարածք է, և որևէ բան չի փոխի այդ հանգամանքը. Սահակաշվիլի

Վրաստանի երրորդ նախագահ Միխեիլ Սաակաշվիլին ֆեյսբուքյան իր էջում գրառում է արել՝ անդրադառնալով Լեռնային Ղարաբաղում ռազմական գործողություններին:

Նա, մասնավորապես, նշել է. 

«Ադրբեջանի և Հայաստանի միջև ռազմական բախումները շատ են վրդովեցնում բոլորիս, ում համար կարևոր է մեր տարածաշրջանում խաղաղությունն ու մեր ժողովուրդների բարեկեցությունը: Այսօր գոյություն չունի ավելի մեծ արժեք: Այդ պատճառով սրտի ցավով եմ հետևում մարդկային զոհերին և իրավիճակի էսկալացիային: Իմ դիրքորոշումը լիովին ակնհայտ է, այն հիմնված է տարածքային ամբողջականության սկզբունքի վրա, ուրեմն Լեռնային Ղարաբաղը Ադրբեջանի Հանրապետության ինքնիշխան տարածք է, և որևէ բան չի փոխի այդ հանգամանքը: Իհարկե, միևնույն ժամանակ, այս տարածաշրջանի բոլոր փախստականներն իրավունք ունեն վերադառնալու իրենց տներ, և ով արդեն այնտեղ է ապրում, նրանք իրավունք ունեն շարունակելու մնալ տարածքում․ նրանց իրավունքները պետք է պաշտպանված լինեն: Վրաստանի շահերից է բխում Կովկասի երեք ազգերի միջև  եղբայրական բարեկամական հարաբերությունների առկայությունը: Մեր ապագան Բալթյան երեք երկրների հարաբերությունների նման պիտի լինի: Միայն արտաքին ուժերի շահերից  է բխում, որ մեր կապերը խափանեն, մենք դրա հնարավորությունը նրանց ոչ մի դեպքում չենք տա»: