Մոլորակի ամենատարեց բնակչուհին հասել է երկարակեցության ռեկորդի

Լրացել է ճապոնուհի Կանե Տանակեի 117 տարին եւ 260 օրը: Նրան Գիննեսի ռեկորդների գրքում ներառել են որպես մոլորակի ամենատարեց բնակչուհի: Այդ մասին հաղորդում է ՌԻԱ «Նովոստի»-ն:

Դա երկարակեցության համաճապոնական ռեկորդ է, այն սահմանել է 2 տարի առաջ վախճանված Նաբի Տաձիման:

Կանե Տանակեն ծնվել է 1903 թվականի հունվարի 2-ին: Նա սիրում է շոկոլադ եւ գազավորված ըմպելիքներ եւ հույս ունի, որ կապրի մինչեւ 120 տարեկանը:

Վերջին տվյալների համաձայն՝ ներկայումս Ճապոնիայում 80 հազարից ավելի մարդ հարյուրից բարձր տարիքի է, նրանց 88 տոկոսը կանայք են: Ընդ որում՝ 1963 թվականին Ճապոնիայում կար հարյուրից բարձր տարիքի 153 մարդ, բայց արդեն 1981 թվականին նրանց թիվը հասավ հազարի, իսկ 1998 թվականին՝ 10 հազարի։