Իլոն Մասկն արդեն աշխարհի ամենահարուստ մարդկանց եռյակում է

Ամերիկացի ձեռնարկատեր Իլոն Մասկն աշխարհի ամենահարուստ մարդկանց ցուցակում զբաղեցրել է 3-րդ տեղը՝  այդպիսով առաջ անցնելով Facebook-ի հիմնադիր Մարկ Ցուկերբերգից. գրում է Bloomberg-ը՝ նշելով, որ, փորձագետների գնահատականներով, Tesla և SpaceX ընկերությունների հիմնադրի կարողությունն օգոստոսի 31-ին գերազանցել է 111,3 մլրդ դոլարն այն դեպքում, երբ Ցուկերբերգի կարողությունը կազմում է  110,5 մլրդ դոլար։

Այս պահի դրությամբ երկրորդ հորիզոնականում Microsoft-ի հիմնադիր Բիլ Գեյթսն է՝ 125 մլրդ կարողությամբ, իսկ առաջին հորիզոնականում Amazon-ի հիմնադիր Ջեֆ Բեյզոսն է՝  200 մլրդ դոլար կարողությամբ։

Մասկի կարողության աճի հիմնական գործոնը Tesla-ի բաժնետոմսերի կտրուկ բարձրացումն է. տարեսկզբից դրանց արժեքը բարձրացել է 475%-ով՝ հարստացնելով Մասկին 76 մլրդ դոլարով։