Թուրքիան հայտարարել է պայթյունի հետևանքով ոչնչացված Բեյրութի նավահանգստի վերակառուցման պատրաստակամության մասին

Թուրքական իշխանությունները պատրաստ են վերակառուցել Լիբանանի մայրաքաղաքի նավահանգիստը, որը ոչնչացվել է օգոստոսի 4-ին`հզոր պայթյունից: Այս մասին Բեյրութում կայացած մամուլի ասուլիսում հայտարարել է Թուրքիայի փոխնախագահ Ֆուաթ Օքթայը. հայտնում է Anadolu գործակալությունը:

Ըստ Թուրքիայի փոխնախագահի՝ Թուրքիայից որոնողափրկարարական խմբերը շարունակում են իրենց աշխատանքը Լիբանանի մայրաքաղաքում, և իշխանությունները Լիբանան են մատակարարել 400 տոննա պարենամթերք:

«Թուրքիան պատրաստ է վերակառուցել Բեյրութի նավահանգիստը և հարակից վնասված շենքերը», - ասել է Օքթայը:

Նա նաև նշել է, որ Լիբանանի նախագահ Միշել Աունի հետ հանդիպման ժամանակ Անկարայի ներկայացուցիչները նշել են, որ լիբանանյան կողմը կարող է օգտագործել Մերսինի թուրքական նավահանգիստը մինչև Բեյրութի նավահանգստի վերականգնումը: