Օբաման առաջարկել է Պուերտո Ռիկոն և Կոլումբիայի շրջանն ԱՄՆ-ի առանձին նահանգներ դարձնել

ԱՄՆ նախկին նախագահ Բարաք Օբաման դեմոկրատներին հորդորել է դադարեցնել Սենատի խոչընդոտները և Պուերտո Ռիկոն և Կոլումբիայի շրջանը 51-րդ և 52-րդ նահանգները դարձնել. այս մասին հայտնում է Mediaite– ը՝ կոնգրեսական, սևամորթների իրավունքների պաշտպան Ջոն Լյուիսի հոգեհանգստյան արարողության ժամանակ Օբամայի հայտարարությանը հղումով։ 

Նշվում է՝ նախկին նախագահը ելույթ է ունեցել ի պաշտպանություն դեմոկրատների կողմից հովանավորվող օրինագծի՝ վերականգնելու 1965 թվականի Քվեարկության իրավունքների մասին օրենքի հիմնական դրույթը, այն է՝  Ջոն Լյուիսի Ակտը:

Այս առնչությամբ նա ասել է. «Երբ մենք ընդունենք Ջոն Լյուիսի՝ քվեարկության իրավունքի մասին օրենքը, մենք պետք է շարունակենք աշխատել այն ավելի լավը դարձնելու համար»։ 

Միևնույն ժամանակ Օբաման կոչ է արել՝ բացի ընտրողների գրանցումը ավտոմատ դարձնելուց և ընտրությունների օրը ազգային տոն հռչակելուց, «ապահովել, որպեսզի Ամերիկայի յուրաքանչյուր քաղաքացի կառավարությունում հավասար ներկայացուցչություն ունենա, ներառյալ ԱՄՆ քաղաքացիները, որոնք ապրում են Կոլումբիայի շրջանում և Պուերտո Ռիկոյում»: