COVID-19-ի համավարակը սպառել է ՄԻԱՎ-ի դեմ դեղամիջոցների պաշարները. ԱՀԿ

Ավելի քան 70 երկրներում կորոնավիրուսի համավարակի պատճառով ՄԻԱՎ-ի բուժման համար օգտագործվող հակառետրովիրուսային դեղամիջոցների սպառման վտանգ է առաջացել. հայտնում է ՏԱՍՍ-ը՝ հղում անելով Առողջապահության համաշխարհային կազմակերպության (ԱՀԿ) ուսումնասիրությանը:

Հաղորդագրությունում, մասնավորապես, նշվում է. «73 երկրում կարող է ծանր իրավիճակ առաջանալ: Այդ պետություններից 24-ը հայտարարել են հակառետրովիրուսային դեղամիջոցների խիստ նվազ պաշարների կամ այդ կենսական նշանակության դեղերի մատակարարման խափանումների մասին»։

ԱՀԿ-ի տվյալների համաձայն՝ այս իրավիճակը կարող է ազդել ավելի քան 8 միլիոն մարդու վրա: Սա ՄԻԱՎ-ի դեմ բուժում ստացողների ընդհանուր թվի մեկ երրորդն է:

ԱՀԿ գլխավոր տնօրեն Ադհանոմ Գեբրեյեսուսն այս առնչությամբ հայտարարել է, որ հիշյալ տվյալները «լուրջ մտահոգության տեղիք են տալիս»: