ԱՄՆ-ը Huawei-ն ու ZTE-ն պաշտոնապես ճանաչել է որպես սպառնալիք ազգային անվտանգությանը

Հաղորդակցությունների հարցերով ԱՄՆ դաշնային հանձնաժողովը (FCC) պաշտոնապես հայտարարել է, որ  հեռահաղորդակցության բնագավառում ծառայություններ մատուցող չինական Huawei և ZTE ընկերությունները սպառնալիք են ազգային անվտանգությանը. տեղեկացնում է Yerkir.am-ը` ՌԻԱ «Նովոստի»-ին հղումով:

Huawei Technologies Company-ի (Huawei)-ի և ZTE Corporation-ի (ZTE) մայր և դուստր ընկերություններից, FCC-ի անցյալ տարվա նոյեմբերին ընդունված որոշման համաձայն, արգելվում է ծառայություններ ու սարքավորումներ ձեռք բերել: FCC-ի ղեկավար Աջիթ Փայի խոսքով` երկու ընկերությունն էլ  կապ ունեն Չինաստանի կոմունիստական կուսակցության և զինվորականության հետ, նաև, ՉԺՀ-ի օրենքների համաձայն, պարտավոր են համագործակցել  չինական հետախուզության հետ:

«Այսօրվա հանձնարարականներով, որոնք հիմնված են ապացուցողական մեծ բազայի վրա, FCC-ն Huawei-ն ու ZTE-ն ընդգրկել է ԱՄՆ հեռահաղորդակցության ցանցերի անվտանգության և մեր` 5G-ի հետ կապված ապագայի սպառնալիքների ցուցակում»,- ասվում է FCC-ի հայտարարության մեջ: