Փաշինյանի մոտ քննարկվել է 2021-2023 թթ. պետական միջնաժամկետ ծախսերի ծրագիրը. մի քանի սցենար կա՝ կախված կորոնավիրուսից

Վարչապետ Նիկոլ Փաշինյանի գլխավորությամբ կառավարությունում տեղի է ունեցել խորհրդակցություն, որի ընթացքում քննարկվել է Հայաստանում 2021-2023 թթ. պետական միջնաժամկետ ծախսերի ծրագրի (ՄԺԾԾ) նախագիծը:

Մանրամասն անդրադարձ է կատարվել նախագծի մշակման հիմքում դրված  հիմնական մակրոտնտեսական կանխատեսվող ցուցանիշներին եւ հարկաբյուջետային շրջանակին: Նշվել է, որ նախագծում դիտարկվել են տարբեր սցենարներ՝ պայմանավորված ճգնաժամային պայմաններով եւ հնարավոր զարգացումներով:

Վարչապետ Փաշինյանը հանձնարարել է նախագծի վերաբերյալ ներկայացված առաջարկությունները մանրամասն քննարկել՝ այն լրամշակելու համար, եւ կարեւորել կապիտալ ծախսային ծրագրերի իրականացման ուղղությամբ հետեւողական քայլերի իրականացումն ու նոր նախագծերի մշակմանը միտված աշխատանքները:

«Պետք է ամեն ինչ անել, որպեսզի իրադարձությունները զարգանան լավատեսական սցենարով»,- նշել է կառավարության ղեկավարը: