2020 թ. մամուլի ազատության ինդեքսում Հայաստանը 61-րդ հորիզոնականում է. «Լրագրողներ առանց սահմանների»

«Լրագրողներ առանց սահմանների» միջազգային իրավապաշտպան կազմակերպությունը կազմել է աշխարհում 2020 թ. մամուլի ազատության ինդեքսը. հայտնում է Yerkir.am-ը։

«Մոտենում է լրագրության համար վճռորոշ տասնամյակ՝ կապված կորոնավիրուսի հետ» վերնագրով հոդվածում կազմակերպությունը նշում է, որ լրագրության համար այս տասնամյակը վճռորոշ է լինելու, քանզի կորոնավիրուսը կընդգծի և էլ ավելի կխորացնի բազմաթիվ ճգնաժամեր, որոնք վտանգի կենթարկեն ազատորեն շփումը, անկախությունը, այլակարծությունն ու ճշմարիտ տեղեկատվությունը։

Ըստ ինդեքսի՝ տարածաշրջանում առաջատարը Վրաստանն է՝ գտնվելով 60-րդ հորիզոնականում (180 պետությունից)։ Վրաստանին հաջորդում է Հայաստանը՝ հյուսիսային հարևանին զիջելով ընդամենը մեկ հորիզոնականով։ Հայաստանն ու Վրաստանը համարվում  են «պրոբլեմատիկ իրավիճակ» ունեցող երկրներ։

«Բարդ իրավիճակ» ունեցող Թուրքիան հայտնվել է 154-րդ հորիզոնականում։ «Շատ մտահոգիչ իրավիճակ» ունեցող երկրների ցանկում են հայտնվել Ադրբեջանն ու Իրանը՝ գտնվելով համապատասխանաբար 168 և 173-րդ հորիզոնականներում։

Ցուցակի լավագույն հնգյակում են գտնվում Սկանդինավյան 4 պետությունները՝ Նորվեգիան, Ֆինլանդիան, Դանիան, Շվեդիան, ինչպես նաև Նիդերլանդները։ Իսկ ահա ցուցակը եզրափակում են Թուրքմանստանն ու Հյուսիսային Կորեան։