Ինչու՞ է ԱՄՆ-ն հրաժարվել ԱՀԿ-ին ֆինանսավորելուց. Պետդեպարտամենտի պարզաբանումը

ԱՄՆ պետքարտուղար Մայք Պոմպեոն հայտարարություն է տարածել այն մասին, որ Առողջապահության համաշխարհային կազմակերպությունը (ԱՀԿ) COVID-19-ի դեպքում չի կատարել իր աշխատանքը. հայտնում է Yerkir.am-ը՝  FOX News-ին հղումով։

Նշվում է՝ երեքշաբթի օրը ԱՄՆ նախագահ Դոնալդ Թրամփը հստակեցրել էր, որ Վաշինգտոնը դադարեցնում է ԱՀԿ-ի ֆինանսավորումը, որը, ըստ նրա, ժամանակին տեղեկատվություն չի տրամադրել կորոնավիրուսի մասին, ինչպես նաև ճշմարտությունը չի հասցրել համաշխարհային հանրությանը:

«Մեզ հարցերի պատասխաններ են պետք, մեզ թափանցիկություն է պետք... Մեզ պետք է, որպեսզի ԱՀԿ-ն կատարի իր աշխատանքը, իրականացնի իր հիմնական գործառույթը, որպեսզի աշխարհն ունենա ճշգրիտ, ժամանակին, արդյունավետ, հուսալի տեղեկատվություն այն մասին, թե ինչ է կատարվում համաշխարհային առողջապահության ոլորտում: Եվ այս դեպքում նրանք դա չեն արել»,- ասել է Պոմպեոն լրատվամիջոցի հետ զրույցում։

Հիշեցնենք՝ ավելի վաղ Հոփկինսի համալսարանը հայտնել էր, որ ԱՄՆ-ում հաստատվել է կորոնավիրուսով վարակման մոտ 608 հազար դեպք, մահացել է գրեթե 26 հազար մարդ: