Ըստ ավստրալացի գիտնականների` կա դեղամիջոց, որը 48 ժամում կասեցնում է կորոնավիրուսի բազմացումը բջիջներում. Gazeta.ru

Ավստրալիայի Մոնաշի համալսարանի և Մելբուրնի թագավորական հոսպիտալի գիտնականները հայտնաբերել են, որ իվերմեկտին դեղամիջոցը 48 ժամում կասեցնում է կորոնավիրուսի բազմացումը բջիջներում. տեղեկացնում է Yerkir.am-ը` Gazeta.ru-ին հղումով:

Հետազոտության արդյունքները հրապարակվել են Antiviral Research պարբերականում: Եզրակացության մեջ ասվում է, որ այդ դեղամիջոցի կիրառման շնորհիվ ամբողջ վիրուսային նյութը գործնականում վերացել է:

Գիտնականներն իվերմեկտինն ավելացրել են COVID-19-ով վարակված բջիջների մեջ վարակումից 2 ժամ անց: Դեղամիջոցի մի չափաբաժինը 24 ժամ անց նվազեցրել է վիրուսային ՌՆԹ-ի քանակը 93 տոկոսով, իսկ մեկ օր անց` ավելի քան 99 տոկոսով: Միաժամանակ, գիտնականները դեղամիջոցի տոքսիկ ազդեցություն չեն հայտնաբերել:

Նրանք հույս ունեն, որ իրենց փորձը դեղամիջոցը կորոնավիրուսի դեմ կիրառելու նոր հետազոտությունների հիմք կդառնա: