Արդեն 2 իրանցի պատգամավոր վարակվել է կորոնավիրուսով

Իրանի խորհրդարանի Ազգային անվտանգության և արտաքին քաղաքականության հանձնաժողովի ղեկավար Մոջթաբա Զուլնուրը հայտարարել է՝ վարակվել է կորոնավիրուսով. հայտնում է Yerkir.am-ը՝ ՌԻԱ «Նովոստի»-ին հղումով:

«Այո, կորոնավիրուսի թեստը դրական էր: Մտահոգվելու կարիք չկա, ես կարանտինում են: Աստված տա` մեր ժողովուրդը հաղթահարի կորոնավիրուսը»,- պարզաբանել է պատգամավորը:

Հիշեցնենք՝ ավելի վաղ իրանցի մեկ այլ պատգամավոր` Մահմուդ Սադեկին ևս հայտարարել էր, որ վարակվել է կորոնավիրուսով:

Նշենք՝ Իրանում կորոնավիրուսով վարակի դեպքերի ընդհանուր թիվը հասել է 139-ի, որից 19-ը` մահվան ելքով:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին: