ՏԵՍԱՆՅՈՒԹ. ԱԺ արտահերթ նիստը տևեց մեկ րոպե. խորհուրդը կքննարկի այսօր ևս մեկ արտահերթ նիստ հրավիրելու հարցը

ԱԺ «Իմ Քայլ» խմբակցության մի շարք պատգամավորների նախաձեռնությամբ այսօր Ազգային ժողովն արտահերթ նիստ էր գումարել։ Օրակարգում «Ազգային ժողովի կանոնակարգ» Հայաստանի Հանրապետության սահմանադրական օրենքում լրացումներ և փոփոխություններ կատարելու մասին», «Հանրաքվեի մասին» Հայաստանի Հանրապետության սահմանադրական օրենքում լրացումներ և փոփոխություններ կատարելու մասին»   և «Սահմանադրական դատարանի մասին» Հայաստանի Հանրապետության սահմանադրական օրենքում լրացումներ և փոփոխություններ կատարելու մասին» օրենքների նախագծերն էին. հայտնում է Yerkir.am-ը:

Սակայն «ԱԺ կանոնակարգ» սահմանադրական օրենքի 68-րդ հոդվածի 1-ին մասի 7-րդ կետի համաձայն նախաձեռնողը այսօր առավոտյան հետ է կանչել արտահերթ նիստի օրակարգում ընդգրկված նախագծերը: 

Նիստը փակելուց հետո ԱԺ  խոսնակ Արարատ Միրզոյանը հայտնեց, որ «Իմ քայլը» միջնորդել է կրկին հրավիրել արտահերթ նիստ: Միրզոյանը հայտարարեց, որ Խորհրդի անդամները մեկ ժամից հետո պետք է հավաքվեն՝ քննարկելու նոր արտահերթ նիստ գումարելու հարցը: