Սկսում ենք զորք ուղարկել Լիբիա . Էրդողան

Թուրքիայի նախագահ Ռեջեփ Թայիփ Էրդողանը «2019 թ. ամփոփման հավաքի» ժամանակ անդրադարձել է Լիբիա զորք ուղարկելու խնդրին:

«Լիբիայի հետ համաձայնություն ենք ձեռք բերել: 2020 թ. Միջերկրականում սկսում ենք հորատման ու որոնողական աշխատանքները: Նախ և առաջ «Օրուչ Ռեիս» նավը կիրականացնի սեյսմիկ աշխատանքներ: Միջերկրականում փորձում էին մեզ բանտարկել մեր սահմանների մեջ. նախ Հյուսիսային Կիպրոսի թուրքական հանրապետության, այնուհետև Լիբիայի հետ ի չիք դարձրեցինք այդ փորձերը», - ըստ Yerkir.am-ի՝ հայտարարել է Էրդողանը:

Թուրքիայի առաջնորդը նաև հայտարարեց, որ «Լիբիայի օրինական կառավարության կենսունակության և ամրապնդման ապահովման համար այդ երկիր զորք են ուղարկում» և տարածաշրջանի կայունությունը ամրապնդելու համար շարունակելու են մոբիլիզացնել բոլոր հնարավորությունները:

Հիշեցնենք, որ միայն դեկտեմբերի վերջին Թուրքիան Լիբիա էր ուղարկել Սիրիայում Թուրքիայի աջակցությունը վայելող զինյալ խմբավորումներից 2000 զինյալ, որոնք տեղակայվեցին Տրիպոլիի արևելքում: