Թուրքիայի բնակչության 58 տոկոսը դեմ է Լիբիա զորք ուղարկելուն. հարցում

Թուրքիայի 12 քաղաքներում սոցհարցումներ են անցկացվել, ըստ որի երկրի բնակչության 58%-ը դեմ է հանդես եկել Լիբիա թուրքական զորք ուղարկելուն:

«Ստամբուլի տնտեսական հետազոտությունների» անցկացրած հարցմանը մասնակցել է 1537 քաղաքացի: «Ձեր կարծիքով Լիբիա զորք ուղարկելը ճի՞շտ է» հարցին դրական է պատասխանել հարցվածների 34%-ը, բացասական՝ 58%-ը, իսկ 8%-ն էլ դժվարացել է պատասխանել. ըստ Yerkir.am-ի՝ հաղորդում է t24.com.tr կայքը։

Սահմանային հակամարտությունների նկատմամբ Թուրքիայի դիրքորոշման վերաբերյալ հարցին պատասխանելիս մասնակիցների 75%-ն ասել է, որ Թուրքիան պետք է չեզոքություն պահպանի ու միայն միջնորդական առաքելություն իրականացնի: 15%-ը ճիշտ է համարել հակամարտության մեջ ներգրավվելու և կողմերից մեկնումեկին ռազմաքաղաքական օգնություն ցուցաբերելու Թուրքիայի քաղաքականությունը: