ՌԴ ԱԳՆ-ն հայտարարություն է տարածել Աբխազիայում տիրող իրավիճակի մասին

Ռուսաստանի Դաշնության արտգործնախարարությունը հայտարարություն է տարածել Աբխազիայում տիրող լարված իրավիճակի հետ կապված։Ռուսաստանը կողմերին իրավիճակը կայունացնելու կոչ է արել. ըստ Yerkir.am-ի՝ հայտնում է «ՌԻԱ Նովոստին»։

«Իրադարձությունները գնահատում ենք որպես այդ երկրի ներքին գործ։ Հույս ունենք, որ Աբխազիայում իրավիճակը շուտափույթ կերպով կկարգավորվի՝ իրավական դաշտում, հետաքրքրված կողմերի ուղիղ, խաղաղ երկխոսության միջոցով», — նշված է ՌԴ-ի արտգործնախարարության էջում։

Հիշեցնենք՝ նախօրեին Սոխումիում ընդդիմության կողմնակիցները ներխուժել են դե ֆակտո նախագահի նստավայր։ Նրանք պահանջում են դեֆակտո նախագահ Ռաուլ Խաջիմբայի հրաժարականը և նախագահական ընտրությունների արդյունքների չեղարկում։