«Դաշնակցության» խմբակցության այցը Ճարտար համայնք

Արցախի Հանրապետության Ազգային Ժողովի «Դաշնակցություն» խմբակցության ղեկավար Արմեն Սարգսյանն ու Ազգային ժողովի փոխնախագահ Վահրամ Բալայանը հանդիպել են Մարտունու շրջանի Ճարտար համայնքի բնակիչների հետ:

Պատգամավորները ներկայացրել են Ազգային ժողովի եւ «Դաշնակցություն» խմբակցության գործունեությունը եւ քննարկել երկրի տնտեսական զարգացմանը ու անվտանգությանը վերաբերող հարցեր:

Արմեն Սարգսյանը նշել է, որ գյուղատնտեսության զարգացումը մշտապես եղել է ԱԺ «Դաշնակցություն» խմբակցության ուշադրության կենտրոնում: Նա անդրադարձել է տնտեսական քաղաքականության ոլորտում ունեցած ձեռքբերումներին եւ բացթողումներին:

Վահրամ Բալայանը անդրադարձել է անվտանգության հետ կապված արտաքին քաղաքականության եւ ԱՀ միջազգային ճանաչման խնդիրներին:

Հանդիպման ավարտին Ճարտար համայնքի բնակիչները պատգամավորներին ուղղել են գյուղատնտեսական կոոպերատիվների, երկրի տնտեսական զարգացման, կրթական ծրագրի եւ ‹‹Ղարաբաղ Տելեկոմ» ՓԲԸ-ի ծառայությունների ու բարձր սակագների վերաբերյալ հարցեր:

Պատգամավորները պատասխանել են համայնքի բնակիչների հնչեցրած հարցադրումներին եւ խոստացել՝ հնարավորության սահմաններում ներկայացված հարցերին լուծումներ տալ: