Ահաբեկչական հարձակում Բուրկինա-Ֆասոյում. առնվազն 35 խաղաղ բնակիչ է զոհվել

Բուրկինա-Ֆասոյի հյուսիսային Սում նահանգում ահաբեկիչական հարձակման հետևանքով զոհվել է առնվազն 35 խաղաղ բնակիչ. ըստ Yerkir.am-ի՝ հայտնում է Reuters լրատվական գործակալությունը:

Զոհերի մեծ մասը կանայք են։ Ահաբեկիչների զոհն է դարձել նաև 4 զինծառայող և 3 ոստիկան, իսկ ուժային կառույցների մոտ 20 ներկայացուցիչ ստացել է տարբեր աստիճանի մարմնական վնասվածքներ:

Ըստ լրատվամիջոցի՝ ահաբեկիչների խումբը հարձակվել է Արբինդա քաղաքից ոչ հեռու տեղակայված զինվորականների վրա։ Բանակին հաջողվել է հետ մղել հարձակումը, բայց նահանջելով՝ գրոհայինները ոչնչացրել են խաղաղ բնակչությանը։

Երկրի նախագահ Ռոկա Կաբորեն ցավակցություն է հայտնել զոհերի ընտանիքներին ու քաջալերել նրանց՝ ասելով, որ զինվորականներին հաջողվել է չեզոքացնել 80 գրոհայինի։

Արևմտյան Աֆրիկայում տեղեկայված երկրում 2 օր համազգային սուգ է հայտարարվել։