Կարծիքները, թե Ռուսաստանն ապրում է նախկին հզորությունների հաշվին, թյուր են. Պուտին

Ռուսաստանը չի կարող չօգտվել խորհրդային նվաճումներից. ըստ yerkir.am-ի՝ տարեվերջյան ամփոփիչ ասուլիսում, լրագրողի խնդրանքով մեկնաբանելով քննադատությունը, թե Ռուսաստանն ապրում է խորհրդային ժառանգության հաշվին, ասել է ՌԴ նախագահ Վլադիմիր Պուտինը:

Այնուամենայնիվ, նախագահի խոսքով, վերամշակող արդյունաբերության հզորությունների 75 տոկոսը ստեղծվել է 2000-ականներին, կառուցվել են նոր օդանավակայաններ, երկաթուղային կայարաններ, կրկնակի աճել է դաշնային մայրուղիների թիվը:

«Մեկ այլ վառ օրինակ՝ գյուղատնտեսությունը. ԽՍՀՄ-ը ցորեն էր գնում, իսկ ներկայիս Ռուսաստանը համաշխարհային շուկային ցորեն մատակարարողներից է: Եվ վաճառքով Մոսկվան առաջ է անցել ԱՄՆ-ից ու Կանադայից»,- ընդգծել է Պուտինը՝ հավելելով, որ կարծիքները, թե Ռուսաստանն ապրում է նախկին հզորությունների հաշվին, թյուր են: