Գետնանուշ ուտելիս շնչահեղձությունից փրկված 1.5 տարեկան տղա երեխայի վիճակը ծայրահեղ ծանր է․ «Սուրբ Աստվածամայր» ԲԿ

Նախօրեին տանը գետնանուշ ուտելիս շնչահեղձությունից փրկված 1.5 տարեկան տղա երեխայի վիճակը ծայրահեղ ծանր է. ըստ Yerkir.am-ի՝ հայտնում են «Սուրբ Աստվածամայր» ԲԿ-ից։

«Նախօրեին «Սուրբ Աստվածամայր» ԲԿ է տեղափոխվել 1.5 տարեկան տղա երեխա, որը տանը գետնանուշ ուտելիս շնչահեղձություն է ունեցել ու կորցրել գիտակցությունը:

Ծնողները երեխային անհապաղ հասցրել են մոտակա՝ «Սուրբ Գրիգոր Լուսավորիչ» ԲԿ, որտեղ արձանագրվել է սրտի և շնչառության կանգ ու կատարվել է անհրաժեշտ վերակենդանացման միջոցառումներ:

Ծայրահեղ ծանր վիճակում երեխան տեղափոխվել է «Սուրբ Աստվածամայր» ԲԿ-ի վերակենդանացման բաժանմունք: Ներկայում էլ վիճակը ծայրահեղ ծանր է, օտար մարմինը բրոնխից հեռացվել է, սակայն երեխան դեռ կոմատոզ վիճակում է, միացված է արհեստական շնչառության սարք: Բժիշկները պայքարում են փոքրիկի կյանքի համար: Տարվում է ինտենսիվ բուժում, օրգանիզմի բոլոր կենսական ֆունկցիաները պահպանելու համար»,- նշել է ԲԿ-ի մամուլի խոսնակ Գևորգ Դերձյանը: