Թուրքիան գործարկել է Հայոց ցեղասպանությունը ժխտող կայք

Թուրքիայի նախագահի աշխատակազմը Հայոց ցեղասպանության միջազգային ճանաչման դեմ պայքարի համար գործարկել է 1915.gov.tr կայքը: Անգլալեզու կայքում տեղ են գտել թուրքական պաշտոնական քարոզչամեքենայի ստահոդ ու անհիմն պնդումները՝ 20-րդ դարի սկզբում օսմանյան իշխանությունների արյունարբու գործողությունների վերաբերյալ:

Կայքի առաջին էջում տեղ է գտել Թուրքիայի նախագահ Ռեջեփ Թայիփ Էրդողանի խոսքերը. «Այսօրվա աշխարհում պատմությունից թշնամություն ստեղծելն ու նոր վեճեր առաջացնելը չի կարող ընդունելի լինել և չի բխում մեր համատեղ ապագայի կառուցման տեսլականից»:

Կայքում կան մի շարք նյութեր, փաստաթղթեր, որոնք կոնտեքստից կտրված են և նպատակ ունեն ցուցադրելու, որ իբր հայերն են ըմբոստացել, կոտորել թուրքերին, իսկ հայերի «արտաքսումը» միակ լուծումն էր: Էրդողանի՝ Հայոց ցեղասպանության դեմ հայտարարությունները, նաև ՀՀ երկրորդ նախագահ Ռոբերտ Քոչարյանին ուղղված նամակը տեղ են գտել կայքում:

Կայքում նաև բաժին կա հանուն Հայոց ցեղասպանության միջազգային ճանաչման 1970-80-ականների հայկական կազմակերպությունների գործողությունների վերաբերյալ, իսկ այդ բաժինը վերնագրված է «Armenian terror» (Հայկական ահաբեկչություն):