Դատապարտյալների հիվանդանոցը և «Նուբարաշեն» ՔԿՀ-ն կփակվեն

Ցմահ դատապարտյալներ Արսեն Արծրունին և Աշոտ Մանուկյանը «Արմավիր» ՔԿ-ից տեղափոխվել են «Սևան» ՔԿՀ՝ կիսաբաց ռեժիմի։

Այս մասին այսօր՝ նոյեմբերի 1-ին, «Արմավիր» քրեակատարողական հիմնարկում լրագրողների հետ զրույցում ասաց Արդարադատության նախարար Ռուստամ Բադասյանը։ Ըստ նախարարի` դատապարտյալների զբաղվածության խնդիրների լուծմամբ զբաղվող «Աջակցություն դատապարտյալին» հիմնադրամի հետ կապված մի շարք խնդիրներ են առաջացել, որոնց առնչությամբ այժմ տարբեր քրեական վարույթներ կան:
Նախարարն ասաց, որ 2020 թվականին ունեն ծրագիր՝ փակելու դատապարտյալների հիվանդանոցը և «Նուբարաշեն» ՔԿՀ-ն և այդ կառույցների միավորմամբ բացել այլ կառույց Սիլիկյան թաղամասում. «Շատ տխուր է վիճակը «Նուբարաշեն» ՔԿՀ-ում՝ շենքային պայմանները, կոյուղաջրերի խնդիրը։ Այդ ուղղությամբ տարվում են աշխատանքներ, դուք շուտով հնարավորություն կունենաք տեսնելու։ Նախատեսվում է կառուցել նոր ՔԿՀ՝ դատապարտյալների հիվանդանոցի և «Նուբարաշեն» ՔԿՀ-ի փոխարեն։ Հիմա պետք է նախահաշվային փաստաթղթերը կազմելու համար ունենանք ֆինանսական գնահատական, կլինի պայմանական մրցույթ, որպեսզի հասկանանք՝ այդ աշխատանքները երբ են կատարվելու»։