Արսեն Բաբայանի պաշտպանները միջնորդություն են ներկայացրել նրան ազատ արձակելու մասին

ԱԺ աշխատակազմի ղեկավարի նախկին տեղակալ Արսեն Բաբայանի պաշտպանները միջնորդություն են ներկայացրել նրա նկատմամբ ընտրված խափանման միջոց կալանավորումն անձնական երաշխավորությամբ փոփոխելու և Արսեն Բաբայանին ազատ արձակելու մասին: Այս մասին իր ֆեյսբուքյան էջում գրել է Բաբայանի պաշտպաններից Երվանդ Վարոսյանը։

Նա, մասնավորապես, նշել է.

«Իրավապաշտպան, «Հայաստանի Հելսինկյան կոմիտե» ՀԿ նախագահ Ավետիք Իշխանյանը և Արցախի Հանրապետության Մարդու իրավունքների պաշտպան Արտակ Բեգլարյանը (անձնական կարգավիճակով) գրավոր դիմել են քրեական հետապնդման մարմիններին՝ պատրաստակամություն հայտնելով իրենց խոսքով և վճարվող գումարով երաշխավորելու Արսեն Բաբայանի պատշաճ վարքագիծը քրեական գործի քննության ընթացքում։ Նշված երաշխավորագրերի հիման վրա հսկող դատախազին միջնորդություն ենք ներկայացրել Արսեն Բաբայանի նկատմամբ ընտրված խափանման միջոց կալանավորումը անձնական երաշխավորությամբ փոփոխելու և Արսեն Բաբայանին ազատ արձակելու մասին»:

Yerkir.am-ն ավելի վաղ տեղեկացրել էր, որ Արսեն Բաբայանը ձերբակալվել է հոկտեմբերի 21-ին՝ պաշտոնեական կեղծիք կատարելու կասկածանքով: