ԱՄՆ-ը երկու ռազմաբազա հեռացրել է Սիրիայից

Սիրիայում գտնվող ամերիկյան երկու ռազմաբազայի զինծառայողները հեռացել են դեպի Իրաք: Այս մասին հաղորդում է ՏԱՍՍ գործակալությունը՝ ՌԴ ՊՆ-ին հղումով:

«ԱՄՆ ԶՈւ զինծառայողները լքել են իրենց ռազմաբազաները, որոնք գտնվում են Դադաթ բնակավայրում՝ Մանբիջից հյուսիս-արևմուտք, և Ում-Միալում՝ հեռանալով դեպի Իրաք: Ներկա պահին այդ երկու բնակավայրերը գտնվում են Սիրիայի կառավարական ուժերի վերահսկողության տակ»,- նշված է հայտարարության մեջ:

Newsweek ամսագրի համաձայն՝ Վաշինգտոնը պայմանավորվածություն է ձեռք բերել Մոսկվայի հետ Հալեպի հյուսիսում գտնվող Մանբիջ քաղաքի վերահսկողության վերաբերյալ: Ըստ ամսագրի՝ ԱՄՆ-ը, հեռացնելով զորքերն այդ տարածքներից, աջակցելու է, որ դրանք անցնեն ՌԴ ԶՈւ հսկողության տակ, որպեսզի խոչընդոտեն Թուրքիայի հնարավոր հարձակումներին այդ տարածքների վրա: