Ախալքալաքում միջոցառում է անցկացվել՝ նվիրված Կոմիտասի 150-ամյակին

Սեպտեմբերի 28-ին Ախալքալաքի Երիտասարդական կրթամշակութային կենտրոնում Երիտասարդական և Գյումրիի «Ընտանիք» մանկապատանեկան ստեղծագործական կենտրոնների սաների մասնակցությամբ անցկացվեց միջոցառում՝ նվիրված Ամենայն Հայոց Վարդապետ Կոմիտասի 150-ամյակին: Միջոցառման ընթացքում ներկայացվեցին կոմիտասյան ստեղծագործությունները երգերով, պարերով և երաժշտական գործիքների մեղմ հնչյուններով:

Պարույր Սևակի «Անլռելի զանգակատուն» պոեմից հատվածներով բնութագրվեց Կոմիտասի անցած կյանքի ծանր ուղին, ներկայացվեցին հետաքրքիր փաստեր Վարդապետի մասին: Դահլիճում տիրում էր կոմիտասյան տրամադրություն, հանդիսատեսը համակ ուշադրությամբ և հիացմունքով ունկնդրեց կատարումները: Ելույթ ունեցան ԱԵԿ-ի պատասխանատու Կարինե Թադևոսյանը և կենտրոնի հայոց պատմության խմբակի պատասխանատու Վաչագան Ռստակյանը, իրենց խոսքում նրանք կարևորեցին ժողովրդական երգերի, կոմիտասյան ժառանգության պահպանումը և երիտասարդության շրջանում բարձրակարգ երաժշտության սերմանումը, բարձր գնահատեցին նմանատիպ միջոցառումների անցկացումը և դրանց շարունակական լինելը:

Գյումրիի «Ընտանիք» կենտրոնի փոխտնօրեն Սվետլանա Պետրոսյանը ողջունեց ներկաներին, խոսեց միջոցառման եւ երկու կենտրոնների միջեւ ստեղծված ջերմ կապի մասին։ Նշենք, որ Երիտասարդական և «Ընտանիք» կենտրոնների միջև բարեկամական կապը ունի 5 տարվա պատմություն և պիտի լինի շարունակական՝ փոխադարձ այցերով և միջոցառումների կազմակերպմամբ: