Աստծո օգնությամբ մենք կտարածենք հրեական ինքնիշխանությունը բոլոր բնակավայրերում՝ որպես պատմական Իսրայելի, Իսրայել պետության մաս. Նեթանյահու

Իսրայելի վարչապետ Բինյամին Նեթանյահուն խոստացել է տարածել «հրեական ինքնիշխանությունը» Հորդանան գետի արևմտյան ափին գտնվող բոլոր պաղեստինյան տարածքների վրա։ Այս մասին հայտնում է Reuters լրատվական գործակալությունը:

«Աստծո օգնությամբ մենք կտարածենք հրեական ինքնիշխանությունը բոլոր բնակավայրերում՝ որպես պատմական Իսրայելի և Իսրայել պետության մաս»,-  նոր ուսումնական տարվա մեկնարկին նվիրված միջոցառման ժամանակ դպրոցականների առջև ելույթում հայտարարել է Նեթանյահուն։

Պաղեստինցի պաշտոնյաները քննադատել են Նեթանյահուի հայտարարությունը: Մասնավորապես՝ Պաղեստինի ղեկավար Մահմուդ Աբասի խոսնակ Նաբիլ Աբու Ռդաինահն այն որակել է «իրերի անթույլատրելի վիճակ ստեղծելու փորձի շարունակություն, որը չի հանգեցնի խաղաղության, անվտանգության կամ կայունության»:

Հորդանան գետի արևմտյան ափին՝ պաղեսինյան տարածքներում գտնվող բնակավայրերը նույնիսկ ներքին օրենսդրությամբ Իսրայելի մաս չեն համարվում, իսկ Նեթանյահուի հայտարարությունը հնչել է երկրում համընդհանուր ընտրություններին ընդառաջ:

Լրատվամիջոցը հավելում է նաև, որ հուլիսի 26-ին, իսրայելցիների կողմից Արևելյան Երուսաղեմում պաղեստինցիների տներն ապամոնտաժելուն ի պատասխան, Պաղեստինը հայտարարել էր այդ երկրի հետ ունեցած բոլոր պայմանավորվածությունների դադարեցման մասին: