Էկզոտիկ ծառերի գողությունը բացահայտվել է

Մոսկովյան փողոցում գտնվող խանութ-սրահի դիմացից հուլիսի 1-ին 5 էկզոտիկ ծառ գողացած 3 անհայտ աղջիկները ներկայացել են ոստիկանություն։ Այս մասին տեղեկանում ենք ոստիկանության լրատվության ծառայությունից։

Հուլիսի 1-ին, ժամը 13.46-ին, ոստիկանություն էր զանգահարել մայրաքաղաքի մի բնակիչ եւ հայտնել, որ գիշերը, ժամը 02.30-ին, երեք անհայտ աղջիկներ Մոսկովյան փողոցում գտնվող խանութ-սրահի դիմացից գողացել են հինգ հատ էկզոտիկ ծառ:

Մեկնել էր ոստիկանության Կենտրոնական բաժնի օպերատիվ խումբը:

Օգոստոսի 8-ին քրեական հետախույզները, իրացնելով ստացված օպերատիվ տվյալները, պարզել են կասկածյալներից երկուսի ինքնությունը:

Բացատրական աշխատանքի շնորհիվ Աշտարակ քաղաքի եւ Արարատի մարզի Արբաթ գյուղի բնակչուհիները ներկայացել են բաժին եւ տվել խոստովանական բացատրություն:

Ձեռնարկվում են միջոցառումներ նրանց ընկերուհուն եւ գողոնը հայտնաբերելու ուղղությամբ: Նախապատրաստվում են նյութեր: