Հոնկոնգում հակակառավարական ցույցերի ժամանակ բախումներ են տեղի ունեցել. ոստիկանությունն արցունքաբեր գազ է կիրառել (տեսանյութ)

Չինաստանի հատուկ վարչական շրջան համարվող Հոնկոնգի ոստիկանությունը կիրակի  հակակառավարական չարտոնված ցույցերի մասնակիցների հետ բախումների ժամանակ բերման է ենթարկել 49 անձի. հայտնում  է Daily Mail-ը:

Ցույցը սկզբում համաձայնեցված է եղել իշխանությունների հետ, սակայն որոշ ժամանակ անց ցուցարարների մի մասը դուրս է եկել նախապես համաձայնեցված երթուղուց՝ արգելափակելով կենտրոնական փողոցների մի մասը, ինչպես նաև ստեղծելով խոչընդոտներ հասարակական տրանսպորտի համար:

Տեղի ոստիկանությունը ցուցարարների նկատմամբ արցունքաբեր գազ է կիրառել, որն արդյունք չի տվել, բախումները շարունակվել են: Շյոնվան շրջանի հարակից հատվածներում ցուցարարները տարբեր առարկաներով բարձված սայլ են այրել, որից հետո այն հրել են  ոստիկանների ուղղությամբ:

Դեպքի առնչությամբ ոստիկանությունը մամլո հաղորդագրություն է տարածել, որում նշված է` ծայրահեղական ցուցարարների գործողություններն ավելի ագրեսիվ են դառնում:

Ավելի վաղ տեղեկացրել, էինք, որ բողոքի զանգվածային ցույցերը Հոնկոնգում սկսվել էին հունիսի սկզբին՝ արտահանձնման մասին օրենքում փոփոխություններ կատարելու իշխանությունների որոշման արդյունքում: Փոփոխությունների ընդունման պարագայում թույլ կտրվի Հոնկոնգին կասկածյալներին հանձնել Չինաստանի մայրցամաքային հատվածին, Թայվանին, Մակաոյին, որոնց հետ շրջանը չունի արտահանձնման մասին համաձայնագրեր: