ԱՄՆ-ը փորձում է հերքել Իրանում ԱՄՆ-ի օգտին լրտեսական ցանցի բացայայտման լուրը

ԱՄՆ-ը փորձում է հերքել նախօրեին Իրանի անվտանգության նախարարության տարածած հայտարարությունն այն մասին, թե Իրանում 17 մարդ է ձերբակալվել ԱՄՆ-ի օգտին լրտեսության համար. տեղեկացնում է BBC-ն:

Իրանի անվտանգության նախարարության հայտարարությանն առաջինն արձագանքել է ԱՄՆ պետքարտուղար Մայք Պոմպեոն՝ հերքելով լուրը:

«Իրանի իշխանությունները ստի երկար պատմություն ունեն: Ես կասկածով կվերաբերվեի Իրանի ցանկացած պնդմանն այն գործողությունների մասին, որ նրանք նախաձեռնել են»,- Fox News-ի եթերում հայտարարել է նա:

Ավելի ուշ թեմային է անդրադարձել նաեւ ԱՄՆ նախագահ Դոնալդ Թրամփը՝ կտրուկ հերքելով տեղեկատվությունը:

«Լուրերն այդ մասին ամբողջովին սուտ են: Դա ծայրից ծայր սուտ է: Այդ քարոզչությունն իրականացվում է Իրանի կրոնական վարչակարգի կողմից, որը ձախողվել է եւ չգիտի՝ ինչ անել: Իրանի տնտեսությունն ամբողջովին մեռած է, եւ իրավիճակն ավելի է վատանում: Իրանում իսկական խառնաշփոթ է»,- Twitter-ի իր միկրոբլոգում գրել է ԱՄՆ նախագահը: