20 դատապարտյալ մասնակցել է շախմատային մրցաշարի եզրափակիչ փուլին

Այսօր՝ հունիսի 20-ին՝ շախմատի միջազգային օրը, ՀՀ ԱՆ «Արմավիր» քրեակատարողական հիմնարկում Քրեակատարողական ծառայության և ՀՀ շախմատի ֆեդերացիայի կողմից կազմակերպվեց արագ շախմատի մրցաշարի եզրափակիչ փուլը, որին մասնակցում էին «Արմավիր», «Հրազդան», «Սևան», «Արթիկ», «Դատապարտյալների հիվանդանոց», «Վարդաշեն» և «Կոշ» քրեակատարողական հիմնարկների՝ լավագույն խաղացող դատապարտյալները: Այս մասին հայտնում են ՀՀ ԱՆ քրեակատարողական ծառայության հանրային կապերի բաժնից:

Շախմատային մրցաշարն անցկացնում էր միջազգային կարգի մրցավար Նորայր Քալանթարյանը: Միջոցառմանը մասնակցում էր 20 դատապարտյալ: Բավական թեժ և գրագետ մրցավազքից հետո «Արթիկ» ՔԿՀ-ից դատապարտյալ Գոռ Աջամյանը նվաճեց 1-ին հորիզոնականը, «Արմավիր» ՔԿՀ-ից համապատասխանաբար 2-րդ և 3-րդ տեղերը գրավեցին դատապարտյալներ Արսեն Բազոյանը և Հակոբ Մարտիրոսյանը, 4-րդ հորիզոնականը զբաղեցրեց «Հրազդան» ՔԿՀ-ի դատապարտյալ Ժորա Նադարյանը: